Mama Ajengan Ahmad Syatibi Gentur,
Cianjur eta salah sahiji sosok ulama tanah pasundan anu Al-Alim Al-Alamah
Al-Kamilil-Wara. Anjeunna jumeneng dina pertengahan kurun ka tilu belas hijriyah
(13 H), teu ka uningakeun taun kalahirannana mah. Tapi anu jelas anjeuna masih
keturunan Wali Agung Syeh Abdul Muhyi Pamijahan.
Mama Gentur waktos murangkalihna namina Agus,
saparantosna mulih ti Mekkah digentos ku nami Dagustani, namung
katelahna ayeuna nyaeta Al-Alim Al-Alamah Syeh Ahmad As-Syatibi
atanapi Mama Gentur ceuk urang sunda anu janten anak muridna.
Khobar
ti KH. Emed Cimasuk Garut, saurna kieu:
Waktu
kaula ziarah ka Mama Gentur, Anjeunna ngalalakonkeun nyaeta : “Baheula
Mama tina pohara hayangna boga elmu anu gede tapi Mama asa poekkeun milih guru,
jeung kasaha kudu ngaji teh? Nya teras Mama berangkat ziarah kubur ka Wali
Luar Batang Jakarta didinya Mama ngaos Shalawat Nariyah 4444 balikan
meunang 44 kali tamatan dina waktu dalapan bulan teras Mama ngimpen tepang
sareng Wali Luar Batang sareng ngadawuhkeun kieu : ‘Lamun maneh bener hayang
boga elmu gede jug gera indit ka daerah Garut’”.
Saterasna
Mama ngawitan berangkat ka Pasantren Keresek, pidawuh Ajengan Keresek : “Lamun
ujang hayang hasil elmu gede mah isuk ku Mama dianteurkeun ka pun paman nyaeta
pangersa ajengan Muhammad Adzro'i di Bojong sabab dina waktos ieu
para sepuh anu baroga elmu galede di tiap kabupaten oge lolobana ti pun paman
nyaeta Syeh Muhammad Adzro'i Bojong Garut”. Mama gentur kenging
sawengi nginep di Keresek, enjingna teras dijajapkeun ka Pasantren Bojong.
Kacarioskeun
waktos ngawitan lebet ka pasantren, ku guru di pasantren di sumpah bilih ngagem
elmu sihir, teras Anjeuna ngalaksanakeun sumpahna tanda teu ngagem elmu sihir.
Saterasna di tampi kalayan janten murid di pasantren. Ari barang tuangna salami
di pasantren cekap ku taleus anu dicocolkeun kana sambel roay, tara pisan
enak-enakan ku rupi-rupi katuangan. Upami mendak masalah kitab anu teu acan ka
hartos sok teras ngahadiahan mualifna ku katuangan jeung ku Aurod Shalawat.
Nembe
40 dinten di bojong, Anjeunna parantos ka talar kitab Nazom Yaqulu, Kailani,
Imriti, Alfiyah, Samarqondy jeung Jauhar Maknun. Kaunggulan Pasantren
Bojong Garut nyaeta para santri anu belajar di pasantren eta dimana tos dua
taun mangka jaranten Al-Alim Al-Alamah.
Mama
Gentur netep di Pasantren Bojong mung kenging sataun dugika akhir
bulan Sya'ban margi dipiwarang Syeh Adzro'i nyarengan Kiyai
Rusdi ngaos ka Pasantren Gudang Tasikmalaya. Ari Kiyai Rusdi
teh nyaeta santri Bojong anu waktos Mama Gentur ngawitan mondok di Pasantren
Bojong, Kiyai Muhammad Rusdi
tos tilu taun ngaos didinya. Padahal dua taun oge Kiyai Rusdi the ku Syeh Adzro'i parantos
dipiwarang ngamukim mung ramana teu acan nyatujuan.
Mama
Gentur tos kenging sataun di Bojong sareng Ajengan Muhammad
Rusdi campleng opat taun, tidinya duanana dipiwarang ngaos ka Mama
Syuja'i Gudang Tasikmalaya. Dawuh Mama Gentur, ari Mama Gudang
lamun ngawuruk dipayuneun Kiyai Rusdi akeutna sok noroktok sareng
ngadegdeg bakating ku risi ku elmuna Ki Rusdi. Malihan Mama
Gudang ngadawuh ka Mama Gentur : "Caritakeun ka Ki Rusdi
gera mukim kituh, Kapan ku Kang Adzro'I oge tos dipiwarang jeung tos aya
dina Ridho Guru". Namung weleh anu janten ramana Ki Rusdi
teu acan keneh nyatujuan.
Teras
Kiyai Rusdi saparantos mondok di Gudang teras ngalih deui ka Kiyai
Muhammad Shoheh Bunikasih Cianjur anu di sebat Ba'dul Ikhwan ku Syeh
Ibrahim Bajuri dina kitab Tijan, margi Syeh Shoheh sareng Syeh
Adzro'i eta ngaosna sami ti Syeh Ibrahim Bajuri.
Ari
Mama Gentur mah teras wae netep di Gudang dugi ka salapan taun. Waktos
masantren di Gudang, Anjeuna kantos ngersakeun ziarah ka makam di Geger Manah. Sateuacana
angkat ziarah, Anjeuna saum heula 40 dinten, Nembe teras Anjenna berangkat ka Geger
Manah ngabujeng ka juru kunci makam. Teras linggih dibumi kuncen, lajeng Mama
ngutarakeun pamaksadannana ka kuncen, nyaeta maksad bade ziarah tabaruk
dimakam karamat. Saterasna Mama dijajapkeun ka eta makam. Kinten jam opat subuh
Mama mulih ti makam ngabujeng deui ka kuncen, lajeng ku kuncen disuguhan
kurupi-rupi katuangan. Saparantos salse tina barang tuang, lajeng Anjeuna naros
ka kuncen: "Mang wengi aya hujan kadieu? ", waler kuncen:
"ah teu aya, naha aya naon ajengan?” kuncen semu heran. “Waktos
abdi dimakam nuju ziarah der teh hujan ageung dordar gelap sareng angin anu
pohara ngagelebugna katingalna ku abdi tangkal kayu anu sakitu gedena meni
nguyupuk kana tanah siga anu rek rungkad” waler Mama Gentur. Saur kuncen:
"teras aya naon deui?", waler Mama Gentur: "ah rahasia
teu sanggup ngabejakeun nana”. Dina eta wengi saur ahli kampung aya suara
hayam kongkorongok karungu ku sadayana sedengkeun di eta kampung teu aya anu
gaduh hayam anu model kitu suarana. Sadayana pada kaget ku eta suara hayam,
teras disaridikkeun timana eta bijilna suara. Ari pek teh tetela pisan yen eta
suara hayam teh ti luhur pasir tempat makam anu di ziarahan ku pangersa Mama
Gentur tea.
Saparantos
kenging salapan taun di Gudang, teras Mama Gentur berangkat ka Mekkah
ngaos ka Syeh Hasbullah. Mimiti ngaji di Syeh Hasbullah,
Mama teh pada nyapirakeun. Hiji waktos, Syeh Hasbullah ngadawuh
ka para muridna, mun ceuk sunda mah kieu: "isukan poe rebo urang ngaji
kitab tuhfah muhtaj, tapi muthala'ah heula ku sararea, hasil muthala'ahna
tuliskeun dina buku masing-masing, jeung isuk kudu haladir sararea barawa hasil
tulisanna”.
Enjingna
Syeh Hasbullah mariksa buku para muridna. Barang ret ningal buku
tulisan Mama Gentur, Syeh Hasbullah ngahuleng, teras buku Mama
dipisahkeun ku Anjeunna, teras Syeh ngalanjutkeun deui pamariksaan ka
murid nu sanesna. Saparantos beres mariksa, syeh Hasbullah
ngadawuh: "ngaji Tuhfah moal tulus lantaran teu pantes Syatibi
ngaji ka kaula kuduna oge kaula nu ngaji ka Syatibi, lantaran anu acan
katepi kamuthala'ahan ku kaula dina buku Syatibi geus aya. Kaula teu
wani naswirkeun kitab dihareupeun Syatibi”. Kumargi sadayana pada
nyuhunkeun diteraskeun, oge Mama unjukan supados diteraskeun ngaosna, sanaos nu
diaos ukur lafadzna wungkul. Akhirna Syeh Hasbullah kakara kersa
mung ukur lafadzna wungkul dugi ka tamatna. Dawuh Mama Gentur: " elmu
anu dipake muthala'ah kitab tuhfah eta tina sapalihna elmu anu katampi ti syehuna
bojong".
Waktos
di Mekkah Mama Gentur sok ngersakeun shalat di payuneun Baitullah,
para askar tos pada arapal ka Mama, maranehna sok maparin isyarat ka jamaah anu
sanesna supaya aya tata hormat ka Mama, bari ngucapkeun: "hadza ulamaul
jawa".
Saparantosna
lami di Mekkah teras Mama Gentur berangkat ka mesir maksad neraskeun
thalab elmuna, namung ulama mesir pada ngadawuhkeun: "geus teu aya
pigurueun pikeun Ahmad Syatibi mah". Mama uih deui ka Mekkah
nepangan hiji ulama ahli Qiro'at Quran ti Indonesia keneh anu tos
mukim di Mekkah, nyaeta ti Pulau Bawean, teras duanana silih guruan, Mama
Gentur ngajar elmu mantiq ulama Bawean ngajar elmu qiro'at.
Saparantosna
Mama Gentur mukim di Mekkah kenging tilu taun, saur hiji riwayat teras
aya utusan ti Syeh Shoheh Bunikasih Cianjur, dawuhna: "bejakeun
ka Syatibi gera balik jeung gera mukim di cianjur sabab di daerah pasundan geus
moal aya anu kuat jadi lulugu ngamalkeun elmu anu sabenerna”. Teras Mama
Gentur mulih ka Cianjur ngalanjutkeun ngaos ka Syeh Shoheh Bunikasih,
teras Mama mukim di Gentur. Sateuacan mukim, Mama Gentur ngaos Shalawat
Nariyah heula 4444 wangsulan supados mukimna dipaparin tambihan elmu sareng
tambih-tambih manfaatna.
Ari
ahwalna tegesna pertingkahna Mama Gentur dina nyebarkeun elmu eta teu
pati-pati nyebarkeun ka muridna iwal parantos dipidamel ku Anjeunna. Mama
nyebarkeun shalawat kanggo umum parantos dipidamel heula salami 40 taun. Waktos
Mama disuhunkeun ngaos kitab Tuhfah Muhtaj, sateu acan diwurukeun
disauman heula 40 dinten. Ari katuangannana cekap kana mangkok sareng uyah. Anjeunna
tara pisan enak-enakan, sakumaha kaayaan nuju nyantri dipasantren we. Dina hiji
waktos Mama khusus diulem barang tuang ku Om Muharam, nyaeta menak Cianjur
anu kaya-raya. Sagala rupi katuangan sareng inuman disayogikeun, namung anu dituang
ku anjeunna mung ukur nyocolan uyah. Kaayaan kitu teh salawasna. Paling sakali
waktos tuangna teh sareng pepes burayak hasil ternak anjeuna, margi padamelan
kasabna sok megarkeun endog lauk janten burayak. Malihan dina hiji waktos Mama
Gentur megarkeun endog lauk dibalong. Pas parantos megar, janten burayakna
teh teu cara ti sasari, waktos harita sadayana binih burayak kacida pisan mulus
sareng seu’eurna. Tidinya Mama nyauran padamelna anu jenengan Ki Yusuf,
dawuhna: "suf, kadieu bawa pacul teh ", saur Ki Yusuf:
"bade aya pikersaeun naon Mama?", Dawuh Mama Gentur : "wayahna
eta tamakan balong gali jeung dodorkeun", waler Ki Yusuf
: "atuh panginten palid burayakna ?", Dawuh Mama Gentur
: "enya ngahaja sina palid lantaran alus teuing, bisi istidraj karana
rumasa Mama teu bisa ibadah". Pas parantos seep satengahna nembe Ki
Yusuf dipiwarang ngaruang deui galian.
Kacarios
waktos Mama Gentur nuju ngawuruk para santrina sareng para sepuh anu
biasa sok ngaos rutinan, tidinya dongkap ka Mama utusan ti pamarentahan Kolonial
Belanda, Mama diulem kedah hadir dina diskusi program perpolitikan Belanda.
Waktos harita Mama Gentur nyelang heula ngahadiran teu disarengan ku
saha-saha. Teu kantos lami Mama tos sumping deui ka madrasah maksad bade
neraskeun hanca anu dikantun. Para santri anu nunggu-nunggu hoyong terang
pembicaraan naon anu di diskusikeun ku kaum Belanda, tapi Mama Gentur weleh
teu ngawartoskeun sakecap-acan. Ieu ciri tawis Mama Gentur teu
ikut-ikutan dina soal politik, dugi ka Mama teh kenging penghargaan kaamanan ku
tanda bulan bintang tilu ti Wihalminak nyaeta Gubernur Hindia
Belanda.
Di
jaman pamarentahan Jepang Mama Gentur kenging hadiah ti Kaisar
Tenoheka, kumargi idiologina Mama murni ngamalkeun ajaran agama, teu
maksad nyampurkeun politik sareng agama.
Mama
Gentur ngarang rupi-rupi kitab kirang langkung 80 kitab bahasa arab
sareng sundana, di antarana nyaeta Sirojul Munir sareng Tahdidul
Ainain dina elmu fikih, sareng Al-Mukadimah Samarkandiyah, Al-Fathiyah,
sareng Dahlaniyah dina elmu bayan, sareng kitab Nadzom Addudiyah dina
elmu munadzoroh, sareng seu'eur deui anu sanesna. Sapalih karangannana dina
elmu bayan aya anu nyebar dugi ka tanah Arab. Para ulama Mesir pada ningali
kana eta karangan, sarta ngalem bari pada ngucap: "gening di tanah jawa
oge bet aya ulama anu pinter kana elmu" .
Mama
Gentur wafat dina dinten Rebo 14 Jumadil Akhir 1365 H atanapi 15 Mei
1946 M.
0 Response to "Riwayat Mama Ahmad Syatibi Gentur, Cianjur"
Posting Komentar
Komentarna Sing Sopan Nya!